Vir baie ons is dit moeilik om 'n God van oordeel, 'n God van geregtigheid en regverdigheid en wraak, met die God wat liefde is, die hemelse Vade wat Jesus openbaar het, te versoen. En dit maak dit moeilik vir baie hedendaagse mense om die evangelie te verstaan en te aanvaar as waarheid. Vir baie jongmense en ateïste vandag is die vraag nie meer "Is dit regtig waar?" nie, maar "Is God regtig goed?". Al meer word die God van die Bybel, en selfs Jesus, wat van die komende oordeel gewaarsku het, as 'n morele monster uitgebeeld... want "'n God van liefde sou nooit toegelaat het wat Hy toegelaat het nie", "'n God van liefde sou bloot vergeef het en nooit enige-iemand gestraf het nie.". Uit so 'n wêreldsbeeld, waar ons as mense basies goed is met hier en daar 'n effense vrot kolletjie, is die Regter die Een wat in die beskuldigdebank hoort. Jesus se dood aan die kruis maak geen sin nie en oorbodig, want "'n God van liefde sou vergewe het sonder om enige betaling of offer te vereis." Sonde kan bloot afgeskryf word sonder dat versoening nodig is. Nie net kan nie, maar behoort afgeskryf en verskoon te word, as God 'n God van liefde is.
Die probleem met hierdie wêreldaanskouïng, is eerstens dat dit skynheilig is: God word blameer dat Hy niks aan die sonde in die wêreld, die morele boosheid wat mense aangedoen is en aangedoen word, doen nie. Maar dan ter selfder tyd, dat Hy geen reg het om diegene wat verkeerd doen, te oordeel of te straf nie. Hier is inderwaarheid net een van drie opsies moontlik: God keer alle sonde deur mense met mag en krag te verhoed om ooit iets teen sy volmaakte wil te doen. Dit is 'n wêreld sonder vry wil, waar mense, soos diere bloot instinktief sou optree (en natuurlik net goeie instinkte sou hê) of soos robotte niks anders sou kon doen as wat die Meester wou hê nie. Dit is ook 'n wêreld sonder liefde, aangesien geen ware liefde moontlik is sonder vrye keuse nie. Die tweede opsie sou wees om soos die Deïstiese God nooit in te meng met wat mense doen op aarde nie. Algehele vryheid, sonder enige gevolge (konsekwensies) vir die een wat verkeerd doen en teen God se wil optree. Geen oordeel nie. Maar ook geen veroordeling van die boosheid in die wêreld nie. Geen verwagting dat die boosheid in die mens ooit oorwin sal word of beperk sal word nie (want die mens is basies goed en kan self besluit wat is reg en verkeerd). Hierdie is hoe baie mense (Christene ingesluit) die wêreld sien. Die ander opsie is dat God regverdig is en dat elke mens verantwoording sal doen teenoor God vir elke woord en elke daad op hierdie aardie gedoen. Dít is nader aan die Bybelse boodskap. Dit is net met hierdie agtergrond dat die liefde en genade van God in Jesus sin maak. Want God het ons nie gestraf met die straf wat ons regtens verdien nie, maar ons sonde vergewe omdat Jesus die sonde en die straf daarvoor op Homself geneem het. Nie net spring ons die straf wat ons verdien vry as ons ons vertroue in Jesus stel nie, ons word in die posisie van Jesus self, kind van God, geplaas, sonder dat ons dit verdien het. Die straf wat ons verdien, kry ons nie en die goeie wat ons nie verdien nie, dit gee God aan ons, gratis. Dit is genade.
Maar genade maak nie sin sonder reg, regverdigheid en geregtigheid nie. As ek nie enige straf verdien nie, dan is daar niks vir God om te vergewe nie. As ek in elk geval goed genoeg is om myself van geboorte af as God se kind te beskou, dan was Jesus se posisie en die gawe van kindskap en die hemelse prys niks minder as wat ek verdien nie. Dan is die dood wat ons tans op aarde beleef, enige dood, onregverdig en wreed. En dit is waarom die Bybel met die Wet (Torah) begin. Want die Wet is daar om vir ons te wys hoe ver ons tekort skiet by God se standaard. Hoe skuldig ons onderdaad is en wat die straf is wat ons inderdaad verdien. Jesus kom en o.a. in die bergpredikasie kom wys Hy vir ons wat God se standaard in die Torah inderwaarheid behels. As jy vir jou broer sonder rede kwaad is, het jy in jou hart moord gepleeg. As jy na 'n vrou kyk met begeerte in jou hart, het jy egbreuk gepleeg. Sondes wat in die Torah met die dood strafbaar is. Dit is God se perspektief.
Maar ek het onlangs vir die eerste keer besef wat God se regverdigheid (en heiligheid) eintlik behels... waarom 'n God van liefde, wat beveel het, "Doen aan ander soos jy wil hê hulle aan jou moet doen." (die goue reël), juis 'n God van oordeel, wraak en geregtigheid is (Ps.92). Want die regverdige oordeel van God is juis hierdie liefdesgebod (die goue reël) toegepas op diegene wat dit nie gehoorsaam nie en nie daarvolgens leef nie. "Soos jy aan ander gedoen het, so sal aan jou gedoen word." Dít is die grondbeginsel agter die straf van die Torah. Dít is regverdigheid en reg. In die woorde van Jesus as Hy kom om te oordeel (Matt.25:31-46): "Amen, Ek sê vir julle: Wat julle ook al vir een van die geringstes broers van My gedoen het, het julle vir My gedoen. ... Amen, Ek sê ver julle: Wat julle vir een van hierdie geringstes nie gedoen het nie, het julle ook vir My nie gedoen nie." Dit is hierdie selfde Jesus wat gaan kom om te oordeel, die Een wat aan die kruis gesterf het vir ons. Die God van oordeel en regverdige wraak, is dieselfde as die God van passievolle liefde... en die beginsel van die oordeel bloot as die goue reël van liefde toegepas op sondaars: Alles wat jy aan ander gedoen het (en nagelaat het om te doen), só sal aan jou gedoen word. En onder hierdie reël sal almal van ons skuldig staan, as ons nie die geregtigheid en liefde en goedheid van Jesus aanneem as ons enigste geregtigheid voor God nie. Solank ons op onsself en ons eie goedheid vertrou, sal ons daarvolgens geoordeel word. Maar as ons besef dat ons skuldig staan en nooit in die teenwoordigheid van 'n heilge God durf staan nie, dan is Jesus die Een wat al ons skuld op Homself geneem het en aan ons Sy geregtigheid gee; wat self deur sy Gees binne ons kom woon en ons verander na sy beeld, sodat waneer ons eendag voor God sal staan, ons nie met ons vuil vodde van eiegeregtigheid en "bes probeer" hoef te staan nie, maar met sy volmaakte en volkome heiligheid en geregtigheid, omdat Hy Self in ons leef, ons sonde bedek met sy lewensbloed wat vir ons gestort is.